6-р сарын 19-нд дайныг дуусгахаар албан ёсоор гарын үсэг зурна

АНУ болон Иран 4 сар орчим үргэлжилсэн мөргөлдөөнийг эцэслэх энхийн хэлэлцээрт хүрснээ зарлалаа. Пакистаны Ерөнхий сайд Шехбаз Шарифын мэдээлснээр хоёр тал цэргийн ажиллагааг бүх фронтод нэн даруй бөгөөд байнгын байдлаар зогсоохоор тохиролцсон бөгөөд хэлэлцээрийн албан ёсны гарын үсэг зурах ёслол 6-р сарын 19-нд Швейцарь улсад болно. АНУ-ын Ерөнхийлөгч Дональд Трамп мөн энэхүү мэдээллийг баталж, Ирантай байгуулсан хэлэлцээр бүрэн хийгдсэнийг мэдэгдсэн байна.

Хэлэлцээрийн хүрээнд дэлхийн эрчим хүчний зах зээлийн хамгийн чухал цэгүүдийн нэг болох Ормузын хоолойг дахин нээхээр болсон нь онцгой ач холбогдолтой үйл явдал болж байна. Трампын мэдэгдсэнээр АНУ тэнгисийн цэргийн хориглолтоо цуцалж, хоолойг аюулгүй нээх ажлыг эхлүүлэх бөгөөд гарын үсэг зурсны дараа газрын тосны тээвэрлэлтийг хоёр чиглэлд бүрэн сэргээхээр төлөвлөжээ. Дайн эхэлснээс хойш Ормузын хоолой бараг хаагдсан нь дэлхийн газрын тос, байгалийн хий, бордооны нийлүүлэлтийг доголдуулж, эрчим хүчний үнийг огцом өсгөсөн юм.

Хэрэв энэхүү энхийн хэлэлцээр бодитоор хэрэгжиж, Ормузын хоолой бүрэн нээгдэн газрын тосны урсгал хэвийн байдалдаа орвол эрчим хүчний үнэ буурах, инфляцын дарамт суларч эхлэх, улмаар төв банкнуудын мөнгөний бодлогод ирсэн дарамт багасах боломжтой. Энэ нь хөрөнгө оруулагчдыг технологи, хиймэл оюун ухаан, хагас дамжуулагч зэрэг өсөлтийн салбаруудын хувьцаанд дахин хөрөнгө оруулах хандлагыг нэмнэ.