АНУ, Иран ирэх долоо хоногт Пакистанд дахин хэлэлцээ хийх төлөвтэй байна

АНУ болон Иран улс гал зогсоох тохиролцоог үргэлжлүүлэх, цаашлаад энхийн шийдэлд хүрэх зорилгоор ирэх долоо хоногт Islamabad хотод дахин уулзаж магадгүй талаар Пакистаны өндөр түвшний албан тушаалтнууд мэдээллээ. Энэ нь хоёр тал дипломат шийдэл эрэлхийлсээр байгааг харуулсан шинэ дохио болж байна

Өмнөх хэлэлцээгээр JD Vance тэргүүтэй АНУ-ын төлөөлөгчид, Ираны талтай 20 гаруй цаг үргэлжилсэн уулзалт хийсэн ч тодорхой тохиролцоонд хүрч чадаагүй юм. Гэсэн хэдий ч Цагаан ордны зүгээс хэлэлцээний явцад тодорхой ахиц гарч байгаа бөгөөд тохиролцоонд хүрэх боломжийг “эерэг” гэж үнэлжээ.

АНУ-ын Ерөнхийлөгч Трампын засаг захиргаа Ормузын хоолойг бүрэн нээхийг гал зогсоох хэлэлцээрийн гол нөхцөл болгосон хэвээр байгаа ч бодит байдал дээр уг бүсээр дамжин өнгөрөх тээвэрлэлтийн урсгал маш бага хэвээр байсан. Үүнтэй зэрэгцэн АНУ Ираны боомтууд руу чиглэсэн хөлөг онгоцны хөдөлгөөнд хязгаарлалт тогтоосон нь нөхцөл байдлыг улам төвөгтэй болгожээ.

Нөгөө талаас, Ираны төрийн мэдээллийн хэрэгслүүдийн мэдээлснээр Тегеран нефть-химийн бүтээгдэхүүний бүх экспортоо тодорхойгүй хугацаагаар зогсоох шийдвэр гаргасан нь зах зээлд шинэ дарамт үүсгэх эрсдэлийг нэмэгдүүлж байна.

Пакистаны хувьд энэхүү хэлэлцээнд цорын ганц зуучлагчийн үүрэг гүйцэтгэж байгаа бөгөөд хоёр талын харилцааг ойртуулахад чухал үүрэгтэй оролцож буйг Цагаан ордны зүгээс онцолсон байна.

Хэдийгээр гал зогсоох тохиролцоо хүчин төгөлдөр хэвээр байгаа ч сунгах эсэх нь тодорхойгүй байгаа бөгөөд ирэх өдрүүдэд болох магадлалтай шинэ хэлэлцээ нь нөхцөл байдлыг шийдвэрлэх гол алхам болохоор байна.