АНУ Хятадад 50 хувийн тариф ногдуулж магадгүй.

АНУ-ын Ерөнхийлөгч Donald Trump Хятад Иранд зэвсэг нийлүүлж болзошгүй гэсэн мэдээллийн дараа 50%-ийн тариф ногдуулж магадгүй гэж анхаарууллаа.

Энэ мэдээлэл албан ёсоор батлагдаагүй ч Хятадын Ираны дайнд гүйцэтгэж буй үүрэгт анхаарал эрс нэмэгдэж, геополитикийн эрсдэл улам тэлж байна. Хятад өөрийгөө энхийн хэлэлцээг дэмжигч гэж илэрхийлж байгаа ч бодит байдал дээр стратегийн нөлөөллөө илүү идэвхтэй ашиглаж эхэлж байгааг шинжээчид онцолж байна.

Нөгөө талд Хятад нь Ираны гол худалдааны түншүүдийн нэг бөгөөд Ираны нефтийн экспортын ихэнхийг худалдан авч байгаа нь түүний эдийн засгийн ашиг сонирхол энэ бүс нутагтай гүн холбоотойг харуулж байна. Иймээс Хормузын хоолой хаагдах, дайн сунжрах нь Хятадын эдийн засагт ч сөрөг нөлөө үзүүлэх эрсдэлтэй.

Хэрэв зэвсгийн нийлүүлэлт батлагдвал энэ нь Хятадын бодлогын шинэ эргэлт болж, бүс нутгийн хурцадмал байдлыг улам нэмэгдүүлж, дэлхийн зах зээлд тодорхойгүй байдал гүнзгийрэх магадлалтай.

Үүний зэрэгцээ Трампын тарифын сүрдүүлэг бодит хэрэгжих эсэх тодорхойгүй хэвээр байгаа ч түүний өмнөх шийдвэрүүдийг харвал ийм алхам бодит болох боломжийг үгүйсгэх аргагүй.