Nvidia компанийн тайлан зах зээлийн итгэлийг сэргээлээ

AI технологийн тэсрэлт Nvidia компанийн санхүүгийн үзүүлэлтийг дахин хүчтэй өсгөж, ашиг, орлого шинжээчдийн таамгаас давсан гүйцэтгэлтэй гарлаа.

Компанийн орлого 68.1 тэрбум ам.долларт хүрч, өмнөх оны мөн үеэс 73%-иар өссөн бол нэгж хувьцаанд ногдох ашиг 1.62 ам.доллар болж, хүлээлтээс өндөр үзүүлэлттэй гарсан байна. Цэвэр ашиг бараг хоёр дахин өсөж, 43 тэрбум ам.долларт хүрсэн нь AI-ийн эрэлт хэр хүчтэй байгааг харуулж байна.

Өсөлтийн гол хөдөлгөгч нь дата төвийн бизнес байлаа. AI чип нийлүүлэлтээр дэлхийд тэргүүлэгч Nvidia-ийн дата төвийн орлого 75%-иар өсөж, 62.3 тэрбум ам.долларт хүрсэн бөгөөд компанийн нийт орлогын 90 гаруй хувийг бүрдүүлжээ. Томоохон технологийн компаниуд (Amazon, Google, Microsoft, Meta зэрэг) AI дата төвийн дэд бүтцэд их хэмжээний хөрөнгө оруулалт хийж буй нь Nvidia-ийн бүтээгдэхүүний эрэлтийг эрс нэмэгдүүлж байна.

Компанийн ирэх улирлын орлогын төсөөлөл ч мөн хүлээлтээс давсан. Nvidia дараагийн улиралд ойролцоогоор 78 тэрбум ам.долларын орлого олно гэж тооцоолж байгаа нь зах зээлийн таамгаас өндөр үзүүлэлт юм.

AI зах зээлийн өсөлтийн гол ашиг хүртэгч хэвээр байгаа Nvidia-ийн хувьцаа энэ онд технологийн том компаниудаас хамгийн сайн гүйцэтгэлтэйд тооцогдож байна. Ерөнхийдөө Nvidia-ийн тайлан нь хиймэл оюуны эрэлт буураагүй, харин улам эрчимжиж байгааг баталж, дэлхийн технологийн зах зээлийн гол чиг хандлага AI хэвээр байгааг дахин нотоллоо.