АНУ-ын Инфляц бага гарлаа.

АНУ-ын инфляц арваннэгдүгээр сард хүлээлтээс бага өссөн ч Холбооны нөөцийн сангийн зорилтот түвшнээс өндөр хэвээр үлдлээ. Арваннэгдүгээр сарын дундуур засгийн газрын үйл ажиллагаа дахин хэвийн болсноос хойш нийтлэгдэж буй үнийн мэдээллийн эхний багц болж байна. АНУ-ын Хөдөлмөрийн статистикийн товчооноос пүрэв гарагт танилцуулсан мэдээллээр, хэрэглээний үнийн индекс (CPI) арваннэгдүгээр сард жилийн дүнгээр 2.7%-иар өссөн нь есдүгээр сард зарлагдсан 3.0%-аас буурч, зах зээлийн 3.1% өсөлтийн хүлээлтээс доогуур үзүүлэлт боллоо.

Хүнс, эрчим хүч зэрэг хэлбэлзэл өндөртэй ангиллуудыг хассан суурь инфляц жилийн дүнгээр 2.6%-иар өссөн нь 3.0% өснө гэсэн таамгаас мөн доогуур байв.

Аравдугаар сард засгийн газрын удаан үргэлжилсэн “shutdown”-ын улмаас зарим мэдээллийг цуглуулж чадаагүй тул тухайн сарын нийт CPI болон суурь CPI-ийн үзүүлэлтийг нийтлэхгүй гэдгээ мэдэгдэж байсан.

Goldman Sachs-ын үзэж буйгаар, инфляцын тайлан дутуу мэдээлэлтэй байгаа нь зах зээлийн хэлбэлзлийг нэмэгдүүлэх эрсдэлтэй. Тус банк тайландаа “Сарын хоёрдугаар хагаст л үнийн мэдээлэл цуглуулсан нь инфляцыг бодитоос доогуур харагдуулах магадлалтай. Учир нь арваннэгдүгээр сарын дунд үеэс эхлэн баярын хямдралын улиралтай зэрэгцэн бараа бүтээгдэхүүний үнэ огцом буурдаг” хэмээн онцолжээ.