NVIDIA-ийн чипийг Хятадад худалдахыг бүрмөсөн хориглох уу?

The Information сэтгүүл нь 3 эх сурвалжаас иш татан, Трампын засгийн газар NVIDIA корпорацын (NASDAQ: NVDA) багасгасан хүчин чадалтай, хиймэл оюун ухааны чипийг Хятадад худалдахыг хориглохоор төлөвлөж байгаа талаар мэдээлжээ.

Хиймэл оюун ухааны дэвшилтэт чип үйлдвэрлэгч Nvidia компани нь АНУ, Хятадын худалдааны дайнд өртөөд буй.

Хэдийгээр худалдааны хурцадмал байдал намжих үеэр Nvidia-гийн H20 чипийг Хятадад борлуулахыг зөвшөөрсөн ч, БНХАУ дотооддоо чипний бие даасан байдлаа хангахаар зорьж байна.

Nvidia оны эхэнд Хятад улсад хийж буй борлуулалт, ашиг орлогын таамаглалаа цаашид тайланд оруулахгүй гэж мэдэгдсэн.

Гүйцэтгэх захирал Женсен Хуанг, АНУ-ын засгийн газрын шахалт, Хятадын ашиг сонирхлын нарийн зааг дээр тэнцвэрээ хадгалахыг оролдож ирсэн ч Трампын засгийн газрын хатуу байр суурь энэ тэнцвэрийг улам хүндрүүлж байна.