Өнөөдөр АНУ-ын Төв банк хүүгээ бууруулна

Өнөөдөр буюу 2025 оны 09 дүгээр сарын 17-18-нд шилжих шөнө АНУ-ын Холбооны Нөөцийн банк бодлогын хүүгээ бууруулах төлөвтэй байна. Сүүлийн саруудад хөдөлмөрийн зах зээл суларч, инфляц бага зэрэг нэмэгдсэн ч хэрэглээний зардал харьцангуй тогтвортой хэвээр байна. Энэхүү нөхцөл байдалд бодлогын хүүг бууруулах шийдвэр нь эдийн засгийг дэмжих гол алхам болох юм.

Хэрэв хүүгийн түвшин буурвал зээл авах өртөг багасч, компаниудын санхүүжилт болон хөрөнгө оруулалтын өртөг хөнгөрнө. Энэ нь хувьцааны үнэлгээг дэмжиж, S&P 500 зэрэг индексүүд өсөх боломжтойг харуулж байна.

Бодлогын хүүг алхам алхмаар, бага хэмжээгээр бууруулах нь зах зээлд итгэл төрүүлж, эдийн засгийн тодорхойгүй байдлыг зөөлрүүлэх стратегийн чухал хэсэг юм. Огцом, их хэмжээгээр бууруулах нь хөдөлмөрийн зах зээл маш хүнд байгаагийн дохио болж болзошгүй тул эрсдэл дагуулна. Харин жижиг алхмаар бууруулах нь цаашид дахин бууралтын хүлээлт үүсгэж, хөрөнгө оруулагчдад илүү таатай орчин бүрдүүлэх ач холбогдолтой.

Түүнчлэн хүүгийн бууралт нь алтны үнэ болон дэд бүтцийн хөрөнгө оруулалтыг илүү сонирхолтой болгож, валютын ханшийн хэлбэлзлийн эрсдэлээс хамгаалах хэрэгсэл болж өгөх юм.