АНУ-ын Төв банк хүүгээ бууруулснаар аль салбарт ямар боломжууд нээгдэх вэ?

АНУ-ын Холбооны Нөөцийн банк өнөөдөр шөнө бодлогын хүүгээ бууруулж, мөнгөний бодлогыг зөөлрүүлэх мөчлөгийг эхлүүлэх төлөвтэй байна. Ажиллах хүчний зах зээл болон инфляцын үзүүлэлтүүд суларсан нь энэ шийдвэрийн гол шалтгаан болжээ.

Зах зээл дээр хүүг 0.25 хувиар бууруулах магадлалтай гэсэн хүлээлт үүсээд байгаа бөгөөд хөрөнгө оруулагчид энэ нь аль салбарт хэрхэн нөлөөлөх бол гэсэн асуултын хариултыг хайж байна. Тэгвэл салбаруудад хэрхэн нөлөөлж болохыг доор дэлгэрэнгүй авч үзье.

• Технологи: Хүү буурах нь үнэлгээг дэмждэг. Гэхдээ хамгийн сонирхолтой нь хиймэл оюун ухааныг дагасан сэдвүүд болон чип үйлдвэрлэл, үүлэн тооцоолол, дата төвүүдэд хөрөнгө оруулалтын урсгал нэмэгдэх хандлагатай байна.
• Эрчим хүч ба дэд бүтэц: Уламжлалт ёсоороо өндөр ногдол ашгаараа ашигтай болдог энэ салбарт энэ удаад нэмэлт давуу тал бий. AI-ийн хэрэглээ өсөхийн хэрээр цахилгааны эрэлт нэмэгдэж, эрчим хүчний компаниудын үнэ цэнэ давхар өсөх боломжтой.
• Банк, санхүү: Хүү буурах эхэндээ зээлийн маржин шахагдаж, ашиг буурах ч урт хугацаанд эдийн засгийн мөчлөгийг сунгаж, зээлийн эрэлт болон чанарыг сайжруулбал өсөлтөд эерэгээр нөлөөлнө. АНУ-ын том банкууд харьцангуй тэсвэртэй байх бол хөгжиж буй орнуудын банкуудын хувьд сул долларын давуу тал илүү ихээр мэдрэгдэх болно.
• Жижиг хувьцаанууд: Өндөр зардлын дарамтад байсан тул хүү буурах нь том боломж юм. Гэхдээ өрийн түвшин өндөр компаниудад эрсдэл хэвээр байх болно.
• Үл хөдлөх хөрөнгө: Хүү бууралтаас шууд ашиг хүртэнэ. Гэхдээ АНУ-ын орон сууцны зах зээлд нийлүүлэлтийн эрсдэл хязгаарлаж магадгүй юм.
• Хөгжиж буй зах зээлүүд: Долларын сулрал гадаадын хөрөнгийн урсгалыг татаж, өрийн дарамтыг хөнгөвчилнө. Ази болон түүхий эдийн экспортлогч орнууд давуу байдалтай байна. Гэвч эмзэг эдийн засгуудын хувьд доллар дахин хүчтэй болбол эрсдэл өндөр байх болно.

Өндөр өгөөжтэй байсан мөнгөний зах зээлүүдийн өгөөж буурах тул бэлэн мөнгө хадгалах нь ашиггүй болж эхэлж байна. Хөрөнгө оруулагчид бонд, хувьцаа, алт, дэд бүтцийн хөрөнгө рүү хөрөнгөө шилжүүлэх нь оновчтой алхам байх болно.

Ерөнхийдөө хүү бууралт нь зөвхөн том технологийн хувьцааг дэмжихээс гадна жижиг компаниуд, эрчим хүч, дэд бүтцийн салбаруудад илүү их боломж нээнэ. Мөн хөгжиж буй зах зээл, алт, бонд зэрэг хөрөнгийн ангиллууд хөрөнгө оруулалтын багцыг төрөлжүүлэхэд чухал байр суурь эзлэх болно.