Хятад, АНУ худалдааны хэлэлцээг сэргээх боломжийг нухацтай судалж эхэллээ

БНХАУ-ын Гадаад хэргийн яамнаас 2025 оны 5-р сарын 2-ны өдөр мэдээлэл хийж, АНУ-тай худалдааны хэлэлцээ дахин эхлүүлэх боломжийг судалж буйгаа анх удаа албан ёсоор мэдэгдлээ.

Энэ мэдэгдэл нь АНУ-ын Ерөнхийлөгч Дональд Трамп өнгөрсөн сард Бээжинд томилолтоор очих төлөвлөгөөгөө ил болгосны дараахан гарч байгаа юм. Түүний хэлснээр, хоёр талын өмнөх худалдааны маргаануудыг намжаах зорилгоор дипломат хэлэлцээг дахин сэргээх нь чухал хэмээн онцолж байжээ. Хятадын тал энэ саналыг эерэг хандлага гэж үзэж, дотооддоо хэлэлцээний нөхцөл, боломжийг судалж эхэлсэн байна.

БНХАУ-ын Худалдааны яамнаас мөн дараах тайлбарыг хийжээ:

“АНУ-ын зүгээс албан ёсны түвшинд тодорхой санал тавиагүй байгаа ч, худалдааны харилцааг дахин сэргээх сонирхолтой байгаагаа олон сувгаар илэрхийлсээр байна. Бид энэ чиглэлд нөхцөл байдлыг үнэлж, үндэсний ашиг сонирхолд нийцүүлэн шийдвэр гаргах болно.”

Эдийн засгийн зах зээл энэ мэдээлэлд нааштай хандсан нь анзаарагдаж байна. “S&P 500” индекс мэдээллийн дараа бага зэрэг өсч, хөрөнгө оруулагчдын дунд АНУ, Хятад хоёрын харилцаа дахин тогтворжиж магадгүй гэсэн хүлээлт бий болсон нь хөрөнгийн зах зээлийн хөдөлгөөнд шууд нөлөөлжээ.